Aşihara karate komandamız dünya çempionatında 3-cü yerə layiq görülüb

Azərbaycan Karate Federasiyasının Aşihara karate üslubu üzrə milli komandası 1-5 aprel 2026-cı il tarixlərində Türkiyənin Antalya şəhərində keçirilən Aşihara Beynəlxalq Karate Təşkilatının (AIKO) dünya çempionatında uğurla çıxış etmişdir.

20 ölkədən 900 -dən çox idmançının iştirak etdiyi mötəbər yarışda 18 nəfərlik heyətlə təmsil olunan milli komandamız 8 qızıl, 1 gümüş və 2 bürünc medal qazanaraq ümumilikdə 11 medal əldə etmiş və komanda hesabında dünya ölkələri arasında 3-cü yerə layiq görülmüşdür.

Böyüklər arasında Kənan Quliyev və Ülfət Vəliyev qızıl medal qazanmış, İbrahim Xəlilov isə yüksək texniki göstəricilərinə görə “ən texnikalı döyüşçü” adına layiq görülərək fəxri kürsünün ən yüksək pilləsinə yüksəlmişdir.

Uşaqlar arasında 12-13 yaş, 40 kq çəki dərəcəsində Orxan Şahməmmədov komandamızın ilk qızıl medalını təmin etmişdir. Mehdi Xəlilov isə həm döyüş, həm də kata növündə birinci yerə layiq görülmüşdür.

Yarışın ən yaddaqalan çıxışlarından birinə imza atan Ələkbər Mirzəyev həm Aşihara karate, həm də “full kontakt” döyüşlərində qalib gələrək qızıl medal və çempionluq kəməri qazanmışdır.

Gərgin və yüksək rəqabət şəraitində əldə olunan bu nəticələr Azərbaycan idmançılarının beynəlxalq arenadakı mövqeyinin daha da möhkəmləndiyini bir daha təsdiq edir.